Ҳар бир томошабин катта экран ё телевизор
қаршисида ўтириб, фильм томоша қилаётганида бир зум бўлса-да, суратга
олиш майдончасида бўлиб қолишни истайди. Боиси оддий — «Мотор»дан
«Стоп»гача бўлган вақтда кинокартинага кирмай қолган кулгили
ҳангомалардан бохабар бўлиш. Бугун сизларга шу имкониятни ҳадя этамиз.
Санъаткорлар тилидан янграган ҳангомаларни ўқиб, ўзингизни суратга олиш
майдончасига тушиб қолгандек ҳис этасиз
«Оёғимдаги пайпоғим ёним кетган»
Шаҳзода МУҲАММЕДОВА, актриса: — «Тундан тонггача» фильмини суратга олиш
жараёнида жуда кўп кулгили вазиятлар бўлган. Суратга олишни
бошлаганимизда ҳаво чидаб бўлмас даражада совуқ эди. Битта саҳнани
суратга олиб, уйга кириб исинардик. Фильм шу тарзда тасвирга туширилган.
Бир куни Алишер ака Узоқов билан ҳовлидаги саҳнани суратга олиб бўлиб,
одатдагидек исиниш учун уйга кирдик. Ҳамма ўзи билан ўзи овора. Музлаб
кетганим учун оёғимни каминга қўйиб ўтиргандим, бироздан сўнг пайпоғим
ёниб кетса денг! Хонада кулги кўтарилганига ҳам эътибор бермай, ҳовлига
югурдим. Чап оёғимни куйдириб олганим учун яланг оёқларимни қорга кўмиб
турдим. Эртаси куни оёғим шишиб кетган. Лекин суратга олишни давом
эттириш керак. Калиш кийиб юрадиган саҳнани ижро этаётганимда ўзимдан
ўтганини ўзим билганман. Лекин калиш муздек экан, чап оёғим мазза қилган
(кулади)!
«Толиб Мўминовнинг "қуришини” тўрт соат кутганмиз»
Алишер УЗОҚОВ, актёр: — Режиссёрлигимдаги «Менинг дадам бўйдоқ»
фильмини суратга олиш жараёнида жуда кулгили ва жаҳлни чиқарадиган
вазият бўлганди. Кечки пайт Ўзбекистонда хизмат кўрсатган артист Матёқуб
Матчонов ва актёр Толиб Мўминовнинг биргаликдаги саҳнасини суратга
олишдан аввал бир марта репетиция қиладиган бўлдик. Сценарийга кўра,
Матёқуб ака Толиб Мўминовни уришиб, бошига урса, бассейнга йиқилиб
тушиши керак эди. Репетиция бошланди. «Мотор!» дедим. Матёқуб ака Толиб
Мўминовни уришиб, бошига салгина уриб қўйганди, бирданига Толиб ака
ўзини бассейнга отиб юборди-да (мириқиб кулади)! Репетициялигини
билади-ку, деган хаёлда «Ўзингизни бассейнга отиб юборманг яна»,
демагандим. Матёқуб аканинг жаҳли чиқиб, «Нега ўзингни сувга отасан?
Энди сенинг қуринишингни тўрт соат кутамизми?» деди. Ростдан ҳам кейин
тўрт соат кутганмиз. Ўшанда «Матёқуб ака, энди билдингизми, бу ролга
нега айнан Толиб акани таклиф қилганимни?» дегандим. Толиб Мўминов ролга
шу даражада берилиб кетадики, суратга олишми, репетициями, фарқи йўқ.
Кўчадаги тўполон
Севара СОЛИЕВА, актриса: — «Қочоқ келин» фильмини суратга олишда ҳар
куни келин кўйлак кийганман. Бир куни куёв ролини ижро этган ёш актёр
Салмон мени уришадиган саҳнасини суратга олаётгандик. Кутилмаганда
қаердандир бир рус онахон пайдо бўлиб, «Уйланаётган экансан, бахтли
кунингда ҳам келинни уришасанми? Кўчанинг ўртасида келинга бақиришингни
қара!» деб Салмонни уришиб кетса бўладими! Фильм суратга олаётганимизни
ҳар қанча тушунтиришга ҳаракат қилмайлик, барибир тушунмаганди. Бечора
Салмон ундан роса эшитадиганини эшитганди. Мени келин кўйлакда кўрганлар
«тўйи бўлаяпти», деб ўйлаб, бахт тилашганди.«Ўйин ичида ўйин»
фильмининг синов жараёнида ҳам актёр Акбархўжа Расулов билан уришадиган
саҳнамизда бир онахон менинг ёнимни олиб, Акбархўжа билан уришиб
кетганди (кулади). Доим партнёрларим мени деб кампирлардан гап эшитиб
юради.
«Ўрага тушиб кетганман»
Наргиза АБДУЛЛАЕВА,
актриса: — «Жийда гули» фильмини суратга олиш жараёнида деярли ҳар куни
кулгили вазиятлар бўларди. Кинокартинанинг сўнгги саҳнасида партнёрим
Анвар Собиров билан ёмғир остида кўришиб қолиб, йиғлайдиган саҳнамиз
бор. Ёмғир ёғдириш учун махсус машиналар ишлаяпти. Ер сирпанчиқ бўлиб
қолганидан сирпаниб ўрага ўхшаш жойга тушиб кетдим. Анвар ака эса кўзда
ёш билан берилиб роль ижро этаяпти. Кўзини очса, мен йўқман (кулади).
Анвар ака на йиғлашни, на кулишни билади. Режиссёрлар ҳам «Стоп»
десаммикан», деб иккиланиб турибди. Йиғлаяпман, қани энди овозимни биров
эшитса! Ўрадан чиқавермаганимдан кейин югуриб келиб, кўтариб олиб
чиқишган. Ҳомиладор бўлганим учун шикаст етмадимикан, деб тўғри
шифохонага олиб кетишганди.
Пойабзал устахонасида
Зарина НИЗОМИДДИНОВА, актриса: — Режиссёр Музаффар Эркиновнинг «Ягонам»
номли фильми учун махсус декорация, яъни пойабзал тузатиш устахонаси
қурдирилди. Танаффус пайтида пойабзал тузатадиган партнёримнинг жойида
чой ичиб, исиниб ўтиргандим. Бир пайт қарасам, одамлар ростдан пойабзал
тузатадиган жой қурилибди, деб ўйлаб, оёқ кийимларини кўтариб
келишаяпти. Камига мени кўриб, ҳайрон қолгани етмагандек, «Тузатиб
берасизми?» деб, оёқ кийимини қўлимга тутқазганлар ҳам бўлди. Уларнинг
юзидаги ўзгаришни кўрсангиз, кулгидан ўзингизни тўхтатолмайсиз.Шу
фильмда туфлимнинг пошнаси синиши керак бўлган саҳна бор. Суратга олиш
пайтида ўзимнинг туфлимни аяганим учун пошнаси синган оёқ кийим олиб
келишди. Лекин тўғри йўлда юриб кетаётган жойимда туфлимнинг пошнаси
синиб тушди-да! «Аяган кўзга чўп тушар» деб шуни айтишса керак (кулади).
«Сўзим эсимдан чиқиб қолса...»
Рихситилла АБДУЛЛАЕВ,
актёр: — Мен суратга олиш майдончасида кулгили вазиятларга дуч
келмайман. Лекин берилиб роль ижро этаётганимда, айтадиган гапим ёдимдан
чиқиб қолса, кулиб юбораман. Мазза қилиб кулишимдан бутун суратга олиш
жамоаси ҳам мириқиб кулади.
«Бир ой виждоним қийналган»
Умид Искандаров, актёр: — "Ўйин ичида ўйин” фильмида партнёрим Яшин
Хўжаев билан уришадиган саҳнамиз бор. У мени яхшилаб дўппослаб, роса
қийнайди ва мен ҳам жавоб қайтаришим керак. Ўша саҳнада бехосдан қўлига
пичоқ тиқиб олганман. Яшиннинг мардлиги билан суратга олиш давом этган.
"Бу касбимизку, шундай вазиятлар ҳам бўлиб туради. Шу саҳнани охиргача
суратга олиб қўяйлик”, деган. Шунда қўлига стритапцит дори сепиб, бинт
билан боғлаб ролни ниҳоялаганмиз. Лекин Яшин бир ой мени деб азобланган.
Қўли йиринглаб, ишиб кетган. Бехосдан юзага келган вазиятдан бир ой
виждоним қийналиб юрган. Бу суратга олиш саҳнасида юз берган трагик
воқеа. Кулгили вазиятлар ҳам бўлиб туради. Масалан, "Қасд” фильмининг
эпизод саҳнаси учун чидаб бўлмас совуқ ҳавода, қорнинг устида ярим соат
кастюмда ётганман. Ўзбекистон халқ артисти Ёқуб Аҳмедов, актёрлар Бобур
Йўлдошев, Акбархўжа Расулов, Ойдин Юсупова, Лола Элтоева ва менинг
уришадиган саҳнамиз бор эди. Менинг қаҳрамоним ерда ўлиб ётиши керак.
Ўша саҳнада қолганлар ролини ижро этиб олгунча ярим соат қорда ётишимга
тўғри келган. Кейин бир ой шифохонада ётганман (кулади).
Filmlar, Kliplar va boshqa Fayllarni Ko'chirib/Download qilib olmoqchi bo'lsangiz: Internet Download Manager ni sizga Tavsiya etamiz!
Serverdagi Nosozliklar Tufayli Ayrim Kinolar Faqat (Mozilla Firefox) Brauzerida Ko'rsatayabdi.
Agar Sizda Mozilla Firefox Brauzeri Bo'lmasa Uni O'rnatib Oling.Agar Mozilla Firefoxda ham Kinolar Ko'rsatmasa Adobe Flash Playerni O'rnating.Marhamat Pastdagi Rasmlarga Bosgan Holda Ushbu Programmalarni O'rnating.
© 
|