36. Inson o'zini (bu dunyoda dinu iymonga buyurilmasdan, oxiratda esa qayta tirilib hisob-kitob qilinmasdan) bekor tashlab qo'yilishini o'ylarmi (tama' qilurmi)?!

37. Axir u (bachadonga) to'kiladigan maniydan bir (haqir) nutfa emasmidi?!(Qiyomat surasi)
U sizlarni bir jondan (Odamdan) yaratdi, so'ngra undan juftini (ya'ni Havvoni paydo) qildi va sizlar uchun chorva hayvonlaridan sakkizta juftni tushirdi (ya'ni dunyoga keltirdi). U sizlarni onalaringizning qornida uch (qavat) zulmat ichida asta-sekin yaratur. Mana shu Alloh Parvardigorlaringizdir. Barcha podshohlik yolg'iz Unikidir. Hech qanday iloh yo'q, magar Uning O'zigina bordir. Bas (ana o'sha zotga ibodat qilmay) qayoqqa burilib ketmoqdasizlar-a?!

I z o h: Ushbu oyati karimadagi sakkizta juft chorva hayvonidan murod tuya, mol, qo'y va echkining erkak va urg'ochi jinslaridir. Chunki ulardan har bir jins vakili o'z muqobilidagi jins vakiliga nisbatan juft hisoblanadi. Binobarin mazkur to'rt tur hayvon erkak va urg'ochi bo'lib sakkizta juftdir. Endi ona qornidagi uch qavat zulmat — ona qorni, bachadon va bolaning yo'ldoshidir, bolaning asta-sekin yaratilishi esa uning ona qornida avval nutfa, so'ngra bir parcha laxta qon, so'ngra bir parcha go'shtga aylanib borishidir.(Zumar surasi 6-oyat)